Արարատ – պատկերագիրք (հայերեն, անգլերեն, ռուսերեն)

Գիրքն ընդգրկում է Շմավոն Շմավոնյանի այն ստեղծագործությունները, որոնք նա հեղինակել է 1993-2013թթ: Պատկերագրքում Արարատ լեռը և հայրենական բնությունը պատկերող կտավներին զուգահեռ հայ և օտարազգի բանաստեղծների քառատողեր են զետեղված՝ նվիրված սրբազան լեռանը, որը ներշնչանքի աղբյուր է եղել բազմաթիվ նկարիչների, գրողների և արվեստի այլ բնագավառների ներկայացուցիչների համար: Գրքում պատմվում է նաև նկարչի կենսագրության հետաքրքիր դրվագները:

Արարատ լեռը

Արարատյան դաշտի հարավում՝ քաղաքամայր Երևանի դիմաց, հպարտորեն վեր է խոյանում աշխարհի ամենագեղեցիկ լեռներից մեկը՝ սպիտակափառ Մեծ Արարատը կամ Մասիսը, որը Հայկական լեռնաշխարհի ամենաբարձր սարն է: Այդ երկնասլաց լեռը ծովից բարձր է 5165 մ, իսկ Արարատյան դաշտից՝ 4300մ., ստորոտից հաշված՝ աշխարհի ամենաբարձր լեռն է:…

Մասիսը կամ Արարատը հայ ժողովրդի համար նվիրական ու սուրբ լեռ է:

Այսօր Արարատը գտնվում է Հայաստանի սահմանի վրա, Թուրքիայի տարածքում, սակայն այն մեզանից ամեն մեկի էության մեջ է և անբաժան է ամեն հայի ու Հայաստանի պատմությունից: Հայ ժողովուրդը չի կորցրել իր հույսն ու հավատը՝ այն կրկին ունենալու:

Արարատի ստորոտում սփռված է Արարատյան դաշտը, որի միջով իր արծաթ գոտին է կապում Արաքս գետը: Արարատյան դաշտում են Արարատի, Արագածոտնի ու Արմավիրի մարզերն իրենց քաղաքներով, շեն ու գեղեցիկ գյուղերով: Գեղեցիկ է Արարատյան դաշտի համայնապատկերը՝ Մեծ ու Փոքր Մասիսներով, երկնաձիգ բարդիներով ու նրանց վրա՝ սպիտակափետուր արագիլներով:

Լևոն Զոհրաբյան

Նկարչի մասին

Իմ տպավորությամբ գեղանկարչի հանդարտ ու հանդարտեցնող բնաշխարհը, գույների ներդաշնակ համադրումն ու դինամիկան սկբնավորվում ու բխում են նրա ներաշխարհից, էությունից, խառնվածքից: Արվեստանոցում, նրա նկարների բույրով շրջապատված, ինձ զգում եմ Շմավոնի կերտած լուսե տաճարում: Եվ պատահական չէ, որ Շմավոն Շմավոնյան նկարչի, նրբագեղ արվեստագետի ու էսթետի կտավները հանգրվանում են ոչ միայն հայտնի պատկերասրահներում ու հեղինակավոր հավաքածուներում, այլև ԱՄՆ Կապիտոլիումում, Կալիֆորնիայի նահանգապետարանում և այլուր:

Գեղանկարիչ Շմավոն Շմավոնյանը բազմաթիվ ցուցադրություններ է ունեցել աշխարհի շատ երկրներում՝ Ստամբուլում (1989), Ֆրանսիայում (1995), Լիբանանում, Անգլիայում (1996), Քուվեյթում (1997), ԱՄՆ-ում (1999), ԱՄՆ-ի խոշորագույն հիվանդանոցներում՝ «Միտք, մարմին և ոգի» ծրագրի շրջանակներում: Գեղանկարիչ Շ. Շմավոնյանը պարգևատրվել է ՀՀ մշակույթի և արտաքին գործերի նախարարությունների ոսկե մեդալով, Ֆրիտյոֆ Նանսենի ոսկե մեդալով, Մատենադարանի «Մեսրոպ Մաշտոց» հուշամեդալով: Կանադայի Մոնրեալ քաղաքում գործող, ՄԱԿ-ի տնտեսական և սոցիալական հարցերով զբաղվող խորհրդում խորհրդատվական կարգավիճակ ունեցող ինֆորմատացման միջազգային ակադեմիան նկարչին շնորհել է ակադեմիկոսի պատվավոր կոչում: 2011 թ. նկարչին շնորհվել է ՀՀ վաստակավոր նկարչի կոչում:

​Արթուր Ղարագյոզյան